पोर्ट ओ प्रिन्स, ७ असोज (एएफपी) ःहाइटीका लागि अमेरिकी विषेश दूतले बिहीबार आकस्मिकरूपमा राजीनामा दिनुभएको छ । नियुक्ति भएर जिम्मेवारी सम्हालेको दुई महिनामै विषेश दूत डानियल फुटले राजीनामा दिनुभएको हो । अमेरिका र मेक्सिकोको सिमा क्षेत्रमा हाइटीबाट आएकाहरूको विषयमा भएको विवादका कारण उहाँले राजीनामा दिनुभएको बताइएको छ । उहाँले भन्नुभयो, “हाइटीका हजारौँ शरणार्थी तथा अवैध आप्रवासीलाई अमेरिकाबाट हाइटी पठाउन खोजिएको छ ।
वाइडेन प्रशासनको सो निर्णयलाई मैले अमेरिकी प्रतिनिधिको रुपमा सहजीकरण गर्न सकिन ।” उहाँले विदेश मन्त्रीलाई पठाउनुभएको राजीनामा पत्रमा हाइटीमा आफ्नो ज्यान जोगाउन पनि कठिन रहेको उल्लेख गर्नुभएको छ । अमेरिकाको सो निर्णयले हाइटीका जनतालाई आक्रोशित बनाएकाले उनीहरूले कुटनीतिक मर्यादा भूलेर आफुमाथि आक्रमण गर्न सक्ने उहाँले चिन्ता व्यक्त गर्नुभएको छ । उहाँले पत्रमा लेखिएको छ, “आप्रवासी तथा शरणार्थीहरुमा बस्ने शिविर, खाद्य पदार्थ, पैसालगायत अत्यावश्यक चीजको नै अभाव रहेको छ, त्यसैले उनीहरूमा आधारभूत सेवाको सङ्कट छ ।” कतिपय शरणार्थीहरू मानसिक समस्यामा रहेको र कतिपयले आपराधिक क्रियाकलाप गर्ने अवस्था रहेको पनि उहाँले उल्लेख गर्नुभएको छ ।