सरकारले भारत, बेलायत र अमेरिकाका लागि राजदूतको नाम सिफारिस गरेको छ । सरकारका प्रवक्ता सञ्चार तथा सूचना प्रविधिमन्त्री ज्ञानेन्द्रबहादुर कार्कीले भारतका लागि नेपाली राजदूतमा डा शङ्कर शर्मा, संयुक्त अधिराज्य बेलायतका लागि ज्ञानचन्द्र आचार्य र अमेरिकाका लागि प्रा श्रीधर खत्रीलाई नियुक्तिका लागि सिफारिस गर्ने मन्त्रिपरिषद्को आजको बैठकले निर्णय गरेको जानकारी दिनुभयो । बैठकले हरित ऊर्जासम्बन्धी वक्तव्यमा सहमति जनाइ हस्ताक्षर गर्न सहमति दिने तथा सुनकोसी मरिङ डाइभर्सन आयोजनाको प्रथम चरणको निर्माण कार्यका लागि वन क्षेत्र प्रयोग गर्न दिइने निर्णय पनि गरेको छ । यस्तै बैठकले दीर्घकालीन शून्य उत्सर्जन रणनीति राष्ट्रिय अनुकूलन योजना ९२०२१–२०५०० र जलवायु परिवर्तन र त्यसको असर प्रतिवेदन स्वीकृत गर्ने निर्णय पनि गरेको पनि उहाँले जानकारी दिनुभयो । उहाँका अनुसार मन्त्रिपरिषद्ले प्रधानसेनापति प्रभुराम शर्मा नेतृत्वको टोलीलाई भारत भ्रमणका लागि स्वीकृति दिने तथा नेपाली सेनाको उपरथी सरोज प्रताप राणालाई रथिमा बढुवा गर्ने निर्णय पनि गरेको छ । मन्त्रिपरिषद् बैठकले महालेखा परीक्षकको कार्यालयमा रिक्त उपमहालेखा परीक्षक राजपत्राङ्कीत विशिष्ट श्रेणीमा महेश्वर काफ्ले र वामदेव अधिकारीलाई बढुवा गर्ने निर्णय गरेको छ ।
सञ्चार तथा सूचना प्रविधिमन्त्री ज्ञानेन्द्रबहादुर कार्कीले नेपालको विकास प्रयासमा भारत सरकारको निरन्तर साथ र सहयोग प्राप्त हुने विश्वास व्यक्त गर्नुभएको छ । नेपालका लागि भारतका राजदूत विनयमोहन क्वात्रासँग आज आफ्नै कार्यकक्षमा भएको भेटमा उहाँले भारत सरकारको सहयोगमा नेपालमा सञ्चालित विकास आयोजनाहरूको सहज कार्यान्वयनमा भारतबाट निरन्तर सहयोग हुने विश्वास व्यक्त गर्नुभएको सञ्चार तथा सूचना प्रविधि मन्त्रालयले जनाएको छ । नेपाल र भारतबीचको मैत्रीपूर्ण सम्बन्ध सदैव सुमधुर रहने विश्वास व्यक्त गर्दै मन्त्री कार्कीले नेपालको विकासका मुद्दा, द्विपक्षीय आर्थिक सहयोग, व्यापार एवं लगानी अभिवृद्धिमा भारत सरकारबाट सहकार्य भएकामा कृतज्ञता ज्ञापन गर्नुभयो । शिष्टाचार भेटमा राजदूत क्वात्राले नेपालको दूरसञ्चार क्षेत्रमा नवप्रविधिको विकास र आवश्यक लगानी भित्र्याउन सहजकर्ताको भूमिका निर्वाह गर्न आफू प्रतिबद्ध रहेको बताउँदै दुई देशबीच जनस्तरमा रहेको सुमधुर सम्बन्धलाई थप प्रगाढ तुल्याउन सक्रियतापूर्वक लाग्ने दृढता पनि व्यक्त गर्नुभयो । आजै मन्त्री कार्कीसँग नेपालका लागि फ्रान्सका राजदूत जिल बुरबाओले पनि शिष्टाचार भेट गर्नुभएको उक्त मन्त्रालयले जनाएको छ । त्यस अवसरमा मन्त्री कार्कीले नेपाल र फ्रान्सबीच विद्यमान सुमधुर दौत्य सम्बन्ध आगामी दिनमा अझ सुदृढ हुने विश्वास व्यक्त गर्नुभयो । सञ्चार तथा सूचना प्रविधिमन्त्रीले सम्पूर्ण नेपालीलाई कोभिड–१९ विरुद्धको खोपको सुनिश्चितता गर्नु वर्तमान सरकारको प्रमुख प्राथमिकता भएको जानकारी दिँदै लोकतान्त्रिक मूल्यमान्यतालाई मजबुत रूपमा स्थापित गर्ने र समृद्धितर्फको यात्रामा अघि बढ्नु यो सरकारको लक्ष्य भएको बताउनुभयो । उहाँले नेपालको समृद्धिका लागि मित्रराष्ट्र फ्रान्सको पूँजी, प्रविधि र सीप उपयोगी हुने विश्वास पनि व्यक्त गर्नुभयो । फ्रान्सेली राजदूतले अन्तर्राष्ट्रिय मञ्चहरूमा नेपालको प्रतिनिधित्वको प्रशंसा गर्दै नेपालमा फ्रान्सको पूँजी र प्रविधि लगानी गरी सुरक्षण मुद्रण स्थापना गर्ने, नेपालको राष्ट्रिय भूउपग्रह अन्तरिक्षमा राख्ने तथा द्विपक्षीय व्यापार अभिवृद्धिका लागि फ्रान्स र नेपालबीचको सहकार्यलाई घनिभूत बनाउन आफू सक्रियतापूर्वक लाग्ने प्रतिबद्धता व्यक्त गर्नुभएको उक्त मन्त्रालयले प्रेस विज्ञप्ति निकालेर जनाएको छ । –––