रोम, १३ कात्तिक (एएनआई) भारतका प्रधानमन्त्री नरेन्द्र मोदीले क्रिश्चियन धर्मगुरु पोप फ्रान्सिसलाई भारत भ्रमणको निमन्त्रणा दिनुभएको छ । भ्याटिकन सिटीमा शनिबार भएको भेटवार्ताका क्रममा प्रधानमन्त्री मोदीले पोपलाई निमन्त्रणा गर्नु भएको हो । आफुहरूको भेटवार्ता अत्यन्त सौहार्दपूर्ण भएको उहाँले बताउनु भएको श्रोतले जनाएको छ । सुरुमा २० मिनेट मात्रै भेटवार्ता गर्ने तय भएको भएपनि उहाँहरूबीच एक घण्टा कुराकानी भएको अधिकारीहरूले जनाएका छन् । उहाँहरूका बीचमा गरिबी हटाउनेदेखि जलवायु परिवर्तनका विरुद्धमा लड्नेसम्मका विषयमा गहिराईमा छलफल भएको बताइएको छ । भारतका प्रधानमन्त्री मोदी र क्रिश्चियन धर्मगुरु फ्रान्सिसका बीचमा पहिलो पटक भेटवार्ता भएको हो । हिन्दु धर्मावलम्बीहरूको बाहुल्यता रहेको देशका प्रधानमन्त्री र क्रिश्चियन धर्मका गुरु फ्रान्सीसबीचको भेटवार्तालाई महत्वका साथ हेरिएको छ । उहाँहरूको भेटले धार्मिक सहिष्णुता बढाउने र धार्मिक द्वन्द्व न्युनिकरण गर्न सहयोग पुग्ने अपेक्षा पनि गरिएको छ । भारतको हिन्दुवादी पार्टीका रूपमा चिनिएको भारतीय जनता पार्टीका शीर्ष नेतासमेत रहनुभएका मोदीले भ्याटिकन सिटीमा रहेको क्याथोलिक चर्चका २६६ औँ पोपको रुपमा सन् २०१३ को मार्च १३ मा निर्वाचित पोप फ्रान्सिसलाई भेट्नु भएको हो । इटलीको रोममा शनिबारदेखि सुरु भएको जी–२० मुलुकहरूको शिखर सम्मेलनमा सहभागी हुन आएका बेला उहाँले फ्रान्सिसलाई भेट्नुभएको हो । प्रधानमन्त्री मोदी यही अक्टोवर २९ मा सुरु भई ३१ सम्म चल्ने जी २० शिखर सम्मेलनमा सहभागी हुनुभएको छ । सम्मेलनका क्रममा उहाँले अन्य देशका शिर्ष नेताहरुसँग पनि दुई पक्षीय तथा बहुपक्षीय भेटवार्ता समेत गर्ने कार्यक्रम रहेको छ । भेटका क्रममा कोरोनाभाइरसको महामारी, त्यसको असर, आपसी सहकार्य र सहयोगका बारेमा छलफल हुने जनाइएको छ । सम्मेलनमा सहभागी हुन मोदी शुक्रबार इटली आइपुग्नु भएको हो भने आइतबार इटली भ्रमण अन्त्य गर्ने भ्रमण तालिका रहेको छ ।
सिन्हवाले जनाएअनुसार इटलीको राजधानी रोममा शनिबारदेखि जी २० को शिखर सम्मेलन सुरु भएको छ । आइतवारसम्म चल्ने दुई दिने सम्मेलनमा विश्वका प्रभावशाली मुलुकसहित १९ देश र युरोपेली संघका प्रतिनिधिहरु सहभागी भएका छन् । सम्मेलनमा भौतिकरूपमै वा भर्चुअल माध्यमबाट सहभागी हुन मिल्ने व्यवस्था गरिएको छ । सोही व्यवस्था अनुसार चीनका राष्ट्रपति सि चिन फिङ, रुसी राष्ट्रपति भ्लादिमिर पुटिनलगायतका केही शीर्ष नेताहरू भने भर्चुअल माध्यमबाट सहभागी भएका छन् । कोरोनाभाइरसको महामारीका कारण आफुहरू सम्मेलनमा भौतिक रुपमा उपस्थीत हुन नसकेको बैठकस्थलमा नजानु भएका नेताहरूले स्पष्ट पार्नु भएको छ । सम्मेलनमा विषेशगरी जलवायु परिवर्तन, कोरोनाभाइरसको महामारी, पुरानै अवस्थामा फर्किने प्रयासलगायतका विषयमा छलफल भइहेको जनाइएको छ । सम्मेलनको पहिलो दिनको पहिलो सत्रमा ‘विश्व अर्थतन्त्र र विश्व स्वास्थ्य’ शिर्षकमा छलफल केन्द्रीत भएको थियो । त्यसैगरी दोस्रो दिन आइतबार ‘जलवायु परिवर्तन र वातावरण’ र ‘दिगो विकास’ मा केन्द्रीत छलफल हुने जनाइएको छ । सम्मेलनको नेतृत्व सम्मेलन आयोजक मुलुक इटलीका राष्ट्रपति मारियो ड्राघीले गर्नु भएको छ । सम्मेलनलाई सम्वोधन गर्दै उहाँले भन्नुभयो, “हामीले यो महामारीभन्दा अगाडिका सम्मेलनमा राष्ट्रियता, संरक्षणवाद र एकपक्षीयवादमा छलफल गर्ने गरेका थियौँ, तर अहिले सवैको साझा समस्या र चुनौतीका बारेमा छलफल गर्नु परेको छ ।” कुनै देश तथा क्षेत्र विषेशमा छलफल गरेर वा कुनै देश विषेशले मात्रै लड्न नसक्ने भएकाले साझा चुनौतीका बारेमा विचार गर्नुपरेको उहाँले बताउनुभयो । अन्तर्राष्ट्रियस्तरमा आर्थिक सहकार्य र सहयोगका लागि भन्दै जी २० शिखर सम्मेलनको सुरुवात सन् १९९९ मा भएको हो । जी २० अन्तर्गत अर्जेन्टीना, अष्ट्रेलिया, ब्राजिल, क्यानडा, चीन, जर्मनी, फ्रान्स, भारत, इन्डोनेसिया, इटली, जापान, मेक्सीको, रुस, साउदी अरब, दक्षिण अफ्रिका, दक्षिण कोरिया, टर्की, बेलायत, अमेरिका र युरोपेली संघ पर्दछन् ।
एएफपीले जनाएअनुसार चिकित्सकहरूले बेलायतकी ९५ वर्षीय महारानीलाई कम्तीमा पनि दुई साता आराम गर्न चिकित्सकले सल्लाह दिएको भन्ने सञ्चारमाध्यममा समाचार आएपछि प्रधानमन्त्री बोरिस जोनसनले शनिबार ‘महारानीको स्वास्थ्य अवस्था एकदमै राम्रो’ भएको शनिबार बताउनुभएको छ । “मैले महामहिमसँग कुरा गरें र उहाँ एकदमै राम्रो अवस्थामा हुनुहुन्छ,” प्रधानमन्त्री जोन्सनले रोमस्थित बेलायती टेलीभिजन च्यानल ४ सँग सप्ताहन्तमा जी–२० शिखर सम्मेलनका क्रममा भन्नुभयो । “उहाँलाई चिकित्सकको सल्लाह पालन गरेर आराम गर्न भनिएको छ मलाई लाग्छ यो नै सबैभन्दा महत्वपूर्ण कुरा हो । मेरो विचारमा सारा देशले उहाँलाई शुभकामना दिनेछ ।” ‘बकिङहम प्यालेसले शुक्रबार भनेको छ, “हालै ‘प्रारम्भिक स्वास्थ्य परीक्षण’ का लागि अस्पतालमा एक रात बिताएकी महारानीले कम्तीमा पनि अर्को दुई हप्तासम्म निको हुन चिकित्सा सल्लाह पालन गरिरहनुभएको छ ।” उहाँले ग्लासगोमा भएको संयुक्त राष्ट्र जलवायु सम्मेलन ( कोप–२६) मा आफ्नो उपस्थितिलाई रद्द गर्नुभएको छ । यो कदम वातावरणीय विषयहरूमा उहाँको व्यक्तिगत प्रतिबद्धतालाई ध्यानमा राख्दै अझ बढी महत्वपूर्ण मानिएका समय स्वास्थ्यका कारण उहाँको उपस्थिति रद्द भएको छ । –––
