सल्यान, २५ कात्तिक ः सल्यानको पर्यटकीयस्थलको रूपमा रहेको कुपिण्डेताल आठ वर्षपछि पानीले भरिएको छ । विसं २०७० पछि पानीको सतह घट्दै गएको कुपिण्डेताल पानीले भरिएपछि मन्दिरसम्म पुग्न डुङ्गा चढ्नुपर्ने अवस्थामा पुगेको छ । बनगाड कुपिण्डे नगरपालिका–८ मा रहेको कुपिण्डेतालमा पानीको सतह बढेपछि तालमा घुम्न आउनेको सङ्ख्यामा वृद्धि हुन थालेको छ । सरकारले घोषणा गरेको १०० पर्यटकीय गन्तव्यमा सूचीकृत यस तालमा पानी भरिएपछि ताल आकर्षक र सुन्दर देखिएको छ । ताल वरपरका खोलाबाट आउने बालुवा तथा सडक ताल वरिपरि निर्माण गरिएको सडकबाट निस्केको माटोले बर्सेनि ताल पुरिँदै गएकोमा यस वर्ष भने पानी पुरानै अवस्थामा भरिएको स्थानीयवासीको भनाइ छ । आजभन्दा करिब २१ वर्ष पहिले तालमा पानी भरिएर किनारमा रहेको मन्दिरसम्म पानी भरिएको भए पनि त्यसपछिका वर्षमा पानी घट्दै गइरहेको स्थानीयवासी तिलक गोसार्इंले जानकारी दिनुभयो । “तालमा पानीको सतह घट्दै जाँदा यसको सुन्दरता पनि हराउँदै गएको थियो, अहिले भने पानी पहिलेकै अवस्थामा आइपुगेको छ, पानी भरिएपपछि भक्तजन डुङ्गा चढेर मन्दिर आउने गर्न थालेको छन्”, गोसाईंले भन्नुभयो । तालमा भरिएपछि तालको किनारमा निर्माण गरिएका प्रतीक्षालयलगायत रचना तालमा डुबेका छन् । सल्यानलाई कर्णाली प्रदेशको राजधानीसँग जोड्ने एक मात्र खलङ्गा बालुवा सङ्ग्रही सडकदेखि दुई किमी दूरीमा पर्ने कुपिण्डेतालमा पानी भरिएपछि ताल घुम्न आउनेको सङ्ख्यामा वृद्धि हुन थालेको स्थानीयवासी हरिहर कवर बताउनुहुन्छ । “मैले थाहा पाउने बेला जहाँसम्म पानी थियो यो वर्ष पनि त्यहीँसम्म पानीको सतह पुगेको छ, पानी कसरी भरियो भन्ने कुरा त खोजी होला तर अहिले भने ताल यति सुन्दर देखिएको छ कि यसले जसलाई पनि मोहित पार्न सक्छ”, उहाँले भन्नुभयो । मन्दिरका पुजारी मानबहादुर गोसार्इंले तालमा पानी भरिएपछि आकर्षक भएको र घुम्न आउनेको सङ्ख्या पनि बढ्न थालेको बताउनुभएको छ । अहिले ताल घुम्न आउने आन्तरिक पर्यटकको सङ्ख्यामा वृद्धि हुन थालेको गोसाईंले जानकारी दिनुभयो । “तालमा पानी बढ्नुको खास कारण थाहा छैन, यही बेमौसमी वर्षाले नै तालमा पानी भरिएको हो भने पनि तालको पानी घटेर पुरानै अवस्थामा फर्किन करिब तीन महिना लाग्छ”, गोसाईंले भन्नुभयो । ताल संरक्षणका लागि बर्सेनि लाखौँ रकम खर्च गरिएको भए पनि स्थानीयवासीमा सचेतना फैलाउन नसक्दा तालवरपरको सुन्दरता भने घटेको छ । वरिपरिका क्षेत्रमा चरिचरनका रूपमा प्रयोग गरिनु, डालेघाँसका रूपमा वनमा घाँस काट्नुले सुन्दरता घटन थालेको सरोकारवालाको भनाइ छ । धार्मिक किंवन्दतीसँग जोडिएको यस तालमा सधैँ पानी स्वच्छ र सफा हुने भएकाले पनि यहाँ घुम्न आउनेको भीडभाड हुन थालेको छ । यस तालको छेउमा रहेको मन्दिरमा पूजाआजा गरेर वर मागेमा पूरा हुने जनविश्वास रहेकाले पनि यस क्षेत्रको धार्मिक महत्व पनि बढेको मन्दिरका पुजारी गोसार्इंले बताउनुभयो । । खलङ्गा–बालुवासङ्ग्रही सडकखण्डको स्तरोन्नतिको काम भइरहेकाले पनि तालमा घुम्न आउनेको सङ्ख्यामा वृद्धि हुन थालेको छ । ताल घुम्नको लागि झण्डै दुई दर्जन डुङ्गा सञ्चालनमा रहेका छन् । कुपिण्डेतालमा आन्तरिक र बाह्य गरी वार्षिक लगभग २५ हजार पर्यटक पुग्ने गरेका छन् । ताल घुम्नका लागि सुर्खेत, जाजरकोट, दैलेख, बाँके, बर्दिया, दाङ, प्युठान, रोल्पा, रुकुमलगायत देशका विभिन्न जिल्लाबाट आउने गर्दछन् । वर्षमा तीन पटक रङ फेर्ने कुपिण्डेताल २३ दशमलव ५३ हेक्टर क्षेत्रमा फैलिएको छ । तालको लम्बाइ ८३४ मिटर, चौडाइ २५० मिटर र गहिराइ ३४ मिटर रहेको छ । समुद्री सतहदेखि एक हजार १२० मिटर उचाइको तालमा पानीको भाग ५४ लाख ८२ हजार मिलिलिटर रहेको अनुमान छ । –––(रासस)