सुदूरपश्चिम,  सुदूरपश्चिम प्रदेशका मुख्यमन्त्री त्रिलोचन भट्टले कृषि क्षेत्रबाट अपेक्षित प्रतिफल पाउन कृषकहरुको सम्मान र इज्जत राख्न जरुरी भएको बताउनु भएको छ । धनगढीमा आज आयोजित ‘मुख्य मन्त्री एकीकृत कृषि तथा पशुपंछी विकास’सम्बन्धी समीक्षा कार्यक्रममा मुख्यमन्त्री भट्टले कृषकको सम्मान गर्ने सोच नहुँदा कृषि क्षेत्रमा अपेक्षित प्रतिफल आउन सकिरहेको छैन भन्नुभयो । नेपाल कृषि प्रधान देश भएर पनि कृषिसम्बन्धी गतिविधिबाट कृषक खुशी नभएको देखिएको उल्लेख गर्दै उहाँले भन्नुभयो, ‘‘कृषि कर्म गर्ने पुरानो तरिका र सोचभन्दा अब नयाँ सोचले काम गर्न जरुरी भइसकेको छ ।’’ मुख्य मन्त्रीले हिजोको सोचले नभई नयाँ तरिकाले कृषि विकासका गतिविधि अघि बढाउन सरकारले मुख्यमन्त्री एकीकृत कृषि तथा पशुपंछी विकास कार्यक्रम ल्याएको बताउँदै कृषकको हितका लागि सरकार प्रतिबद्ध रहेको बताउनुभयो । भूमि व्यवस्था, कृषि तथा सहकारी मन्त्री विनितादेवि चौधरी र राज्य मन्त्री मानबहादुर सुनारले सयममै मल, उन्नत बीउबिजन नपाउँने र सिँचाइको असुविधा हुने कृषकको समस्या समाधानमा सरकारले पहल गरिरहेको बताउनुभयो । मन्त्रालयका सचिब डा मदनसिंह धामीले कृषि तथा पशुपंछीका क्षेत्रमा भइरहेको आयातलाई प्रतिस्थापन गर्न र प्रदेशलाई आत्मनिर्भरतातर्फ उन्मुख गराउन नमुनाको रुपमा यो कार्यक्रम कार्यान्वयन भइरहेको स्पष्ट पार्नुभयो । कृषि विकास निर्देशनालय दीपायलका निर्देशक र कृषि ज्ञान केन्द्र कैलाली तथा कञ्चनपुरका प्रमुखले कार्यक्रमबाट प्राप्त उपलब्धि, देखिएका समस्यालगायतका विषयमाथि प्रकाश पार्नु भएको थियो । बनाइएको कार्यविधि र मापदण्डका आधारमा छनोटमा परेका गाउँमा आर्थिक वर्ष २०७६÷०७७ देखि ‘नमूना गाउँ आफँै बनाऔँ’ भन्ने नाराका साथ धान, गहँु, आलु, तरकारी, चैते धान, केरा, फलफूललगायतका बालीमा यो कार्यक्रम कार्यान्वयन भइरहेको छ । प्रदेश सरकारले यो कार्यक्रमलाई उच्च प्राथमिकतामा राखेको छ । ———