कर्णाली, सञ्चारिका समूह कर्णाली प्रदेशको अध्यक्षमा सीता वली चयन हुनुभएको छ । समूहको आज सम्पन्न दोस्रो अधिवेशनबाट सुर्खेतका पत्रकार वलीको नेतृत्वमा १३ सदस्यीय नयाँ कार्यसमिति चयन गरिएको हो । समूहको उपाध्यक्षमा कृष्णमाया उपाध्याय (जुम्ला), महासचिवमा चाँदनी कठायत (सुर्खेत), सचिवमा मनिषा केसी (रुकुम पश्चिम) र कोषाध्यक्षमा सिर्जना बुढाथोकी (सुर्खेत) चयन हुनुभएको छ । त्यस्तै सदस्यहरुमा रजनी योगी, सुकमाया शाही, कोमल शाही, तिलसरा विक, पवित्रा जैसी, चन्द्रा कँडेल र कल्पना ढेंगामगर हुनुहुन्छ । थप दुई जना सदस्य मनोनित गर्ने जनाइएको छ । कार्य समितिको कार्यकाल तीन वर्ष रहनेछ । सञ्चारिका समूहकी निवर्तमान प्रदेश अध्यक्ष टीका विष्टले नयाँ नेतृत्वलाई कर्णालीका महिला सञ्चारकर्मीको पेशागत हकहित र व्यावसायिक क्षमता अभिवृद्धिका सवालमा स्थानीय तह र प्रदेश सरकारसँग सहकार्य गरेर काम गर्न सुझाव दिनुभयो । अधिवेशनमा नेपाल पत्रकार महासङ्घका केन्द्रीय सदस्य दीपेन्द्र शर्मा, जिल्ला शाखा अध्यक्ष ललित बसेलले नयाँ नेतृत्वलाई सफल कार्यकालको शुभकामना व्यक्त गर्नुभएको थियो । –––