काठमाडौँ, महिला, बालबालिका तथा ज्येष्ठ नागरिकमन्त्री उमा रेग्मीले काठमाडौँमा रहेका दुई आश्रममा पुगेर ज्येष्ठ नागरिकलाई कपडा र खानेकुरा वितरण गर्नुभएको छ । प्रथम राष्ट्रिय ज्येष्ठ नागरिक दिवसका अवसरमा उहाँले पशुपतिस्थित ज्येष्ठ नागरिक आश्रम र रानीवनस्थित मानव सेवा आश्रम पुगेर त्यहाँका ज्येष्ठ नागरिकसँग भेट गर्नुभएको हो । मन्त्री रेग्मीसँगै सचिव यामकुमारी खतिवडा र मन्त्रालयका कर्मचारी पनि आश्रम पुग्नुभएको थियो । मन्त्री रेग्मीले त्यहाँ रहेका ज्येष्ठ नागरिकलाई हरलिक्स र पछ्यौरा वितरण गर्नुभएको थियो । उहाँले ज्येष्ठ नागरिकसँग प्रत्यक्ष भेटेर अवस्थाका बारेसमेतमा जानकारी लिनुभएको पशुपतिस्थित आश्रमका प्रमुख ओमकुमारी पाण्डेले जानकारी दिनुभयो । मन्त्री रेग्मीले ज्येष्ठ नागरिकलाई सरकार साथमा रहेको भन्दै उहाँहरुलाई सान्त्वना दिनुभएको थियो । आश्रममा ६५ महिला र ३७ पुरुष गरी १०२ ज्येष्ठ नागरिक रहेका छन् । –––