भारत र जापानका प्रधानमन्त्रीबीच जापानको राजधानी टोकियोमा भेटवार्ता
टोकियो, ११ असोज (एएनआई) – भारत र जापानका प्रधानमन्त्री बीच मङ्गलबार जापानको राजधानी टोकियोमा भेटवार्ता भएको छ । भारतका प्रधानमन्त्री नरेन्द्र मोदी मङ्गलबार बिहानै जापानको टोकियो उत्रिनु भएको थियो । उहाँले जापानका समकक्षी फुमियो किशिदासँग दुई पक्षीय हित, साझा चासो र सरोकारका विषयमा छलफल गर्नु भएको छ । जापानका पूर्व प्रधानमन्त्री सिन्जे आबेको अन्त्येष्टि समारोहमा सहभागी हुन मोदी टोकियो आउनु भएको हो । आबेको गत जुलाई ८ मा जापानको नारा सहरमा हत्या भएको थियो । चुनाव प्रचार प्रसारको सिलसिलामा नाराको मुख्य चोकमा आयोजित चुनावी सभालाई सम्बोधन गरिरहेका बेला उहाँमाथि गोली प्रहार भएको थियो । गोली प्रहार हुने बित्तिकै उहाँलाई तत्काल अस्पताल लगिएको भएपनि चिकित्सकहरूले उहाँलाई बचाउन नसकिएको भन्दै मृत घोषणा गरेका थिए । कडा सुरक्षाका बीचमा पनि उहाँको हत्या भएपछि धेरैले आश्चर्य मानेका थिए भने आम नागरिकमा निकै लोकप्रिय नेताका रुपमा चिनिनु भएका आबेको अचानक हत्या भएपछि विश्वभरबाट दुःख व्यक्त भएको थियो । जापानमा सबैभन्दा लामो समय प्रधानमन्त्री हुनुभएका आबेको ७६ वर्षको उमेरमा निधन भएको हो ।