कायरो, २९ असोज (÷एएनआई) – भारतका विदेश मन्त्री एस जयशंकर इजिप्ट भ्रमणमा आउनु भएको छ । दुई दिने भ्रमणका लागि उहाँ शनिबार इजिप्टको राजधानी कायरो आइपुग्नु भएको हो । उहाँले भ्रमणको प्रारम्भमै विदेश मामिला विज्ञ तथा सरोकारवालाहरूसँग छलफल गर्नु भएको छ । उहाँले इजिप्टको भ्रमण अहिले पहिलो पटक गर्नु भएको भारतको विदेश मन्त्रालयका अधिकारीहरुले जानकारी दिएका छन् । दुई देशको सम्बन्ध थप बलियो बनाउन, सहकार्यका क्षेत्र विस्तार गर्न र दुई पक्षीय हितका बारेमा छलफल गर्न उहाँ इजिप्टको भ्रमणमा आउनु भएको बताइएको छ । उहाँले भ्रमणका क्रममा इजिप्टका आफ्ना समकक्षी सहितका सरकारी उच्च अधिकारीहरुसँग अन्तर्राष्ट्रिय चासो र साझा चासो तथा सरोकारका विषयमा पनि छलफल गर्नुहुने जनाइएको छ । भ्रमणका क्रममा उहाँले इजिप्टमा रहेका भारतीयहरुसँग पनि अन्तरक्रिया गर्ने कार्यक्रम रहेको अधिकारीहरुले जानकारी दिएका छन् । इजिप्टका विदेश मन्त्री सामेह हसन शौक्रीको निमन्त्रणामा भारतका विदेश मन्त्री जयशंकरले इजिप्टको भ्रमण गर्नु भएको हो ।