आज खग्रास चन्द्रग्रहण : कुल १ घन्टा २३ मिनेट ग्रहण देखिने

काठमाडौं, २३ कात्तिक (असनबजार पत्रिका) : आज मंगलबार खग्रास चन्द्रग्रहण लाग्ने भएको छ । मंगलबार साँझ ५ बजेर ११ मिनेट जाँदा चन्द्रोदय हुँदा नै ग्रहण लागेर उदय हुने भएकाले मंगलबारको ग्रहणलाई ग्रस्तोदित चन्द्रग्रहण भनिएको छ । नेपाल पञ्चाङ्ग निर्णायक समितिले ग्रहणले पूरै चन्द्रमा ढाक्ने जनाएको छ । साँझ ६ बजेर ३४ मिनेट जाँदा ग्रहण पूरै सकिने छ ।

नेपालबाट कुल १ घन्टा २३ मिनेट ग्रहण देखिने बताइएको छ । सामान्यतः ग्रहण लाग्नु नौ घण्टा अघिदेखि नै सुतक लाग्ने भएकाले शास्त्रीय मान्यता पछ्याउनेहरुले आज बिहान ८ बजेर ११ मिनेटपछि भोजन गर्न नहुने जनाइएको छ । तर, बालबालिका, वृद्धवृद्धा, बिरामी र अप्ठेरो अवस्था हुनेहरुलाई भने त्यसको प्रदोष नलाग्ने पनि शास्त्रीय ब्याख्या रहेको छ । सुतक अवधिभर बार्नेहरुले ग्रहण सकिएपछि मात्र भोजन गर्नु उपयुक्त हुने नेपाल पञ्चाङ्ग निर्णायक समितिले जनाएको छ । ग्रहणका बेला जप, स्नान, ध्यान, पाठलगायत कर्म गर्दा फलदायी हुने शास्त्रीय वचन छ । यही कात्तिक ८ गते औंसीका दिन खण्डग्रास सूर्यग्रहण लागेको थियो । यसरी यो वर्ष कात्तिक महिनाका दुवै पक्षमा ग्रहण परेको छ ।

सिरहा र धनुषाको सिमानास्थित कमला नदीमा भूत मेला लागेको छ । आज नदी किनारमा बिहानैदेखि स्नान गर्ने श्रद्धालुको घुइँचो लागेको छ । कमलाको उत्तराहिनी , सारश्वर, चिकना, बनिनिया, बसपिट्टा, बरेरबा, फूलबरिया, इनर्वालगायतका घाटमा भक्तजनको भीड नै लागेको छ । कार्तिक पूर्णिमामा कमलामा स्नान गर्नाले भूतबैताल भाग्ने र धामी–झाँक्रीले तान्त्रिक सिद्धिप्राप्त गर्ने जनविश्वास रहेको छ ।

बर्सेनि धामी–झाँक्रीले भूत र घरको कूलदेवता खेल्दै कमला नदीमा पुगेर स्नान गर्ने चलन सदियौँदेखि रहिआएको र त्यसैले यसलाई भूत मेला भन्ने गरिएको बताइएको छ । आजको दिन नयाँ–नयाँ धामी–झाँक्री कमला स्नान गरेपछि तन्त्र विद्यामा निपुण हुने मान्यता पनि रहेको छ । भूत मेलामा स्नान गरेपछि घर आउने बेलामा भक्तजनले नदीको शुद्धपानी आ–आफ्नो घर लैजाने गर्छन् । उक्त पानी पूजाअर्चना अथवा सुद्धि गर्न गङ्गाजलजस्तै पवित्र मानिन्छ । भूत मेला हेर्न सो नदी किनारमा हजारौँ सङ्ख्यामा श्रद्धालु भक्तजन सहभागी भएका छन् ।