बेइजिङ, २ फागुन, (-सिन्ह्वा) चिनियाँ प्रधानमन्त्री ली खछ्याङले मङ्गलबार बेइजिङमा इस्लामिक गणतन्त्र इरानका राष्ट्रपति इब्राहिम रायसीसँग भेटवार्ता गर्नुभएको छ । सो अवसरमा प्रधानमन्त्री लीले चीन र इरान दुवै प्राचीन सभ्यता भएको र आफ्ना जनताबीच मैत्रीपूर्ण भावना र विचार आदानप्रदानको लामो इतिहास रहेको बताउँनु भएको छ । चीनले चीन-इरान सम्बन्धको विकासलाई ठूलो महत्त्व दिएको र इरानसँग पारस्परिक सम्मान र समान व्यवहार गर्न इच्छुक रहेको उहाँको धारणा छ। चीनले इरानसँग व्यावहारिक सहयोगको स्तर सुधार गर्ने दिशामा काम गर्न इच्छुक रहेको पनि बताउँदै लीले चीन-इरान बृहत् सहयोग योजना कार्यान्वयन गर्न, अर्थतन्त्र, व्यापार र अन्य क्षेत्रमा सहयोग प्रवर्द्धन गर्न, उत्पादन निर्यातलाई पारस्परिक रूपमा विस्तार गर्न र त्यसको कार्यान्वयनलाई प्रवर्द्धन गर्न दुवै पक्षलाई आह्वान गर्नुभएको छ। जनताको जीविकोपार्जनमा सुधार गर्न, कर्मचारी आदानप्रदान बढाउँन र दुई देशबीचको मित्रताको जनस्तरमा सुदृढ पार्ने पारस्परिक लाभकारी परियोजनाहरू अगाडि बढाउँन पनि काम गर्ने उहाँले उल्लेख गर्नु भएको छ । इरान र चीनबीचको मित्रतालाई उजागर गर्दै रायसीले इरान चीनसँगको सम्बन्ध थप विकास गर्न प्रतिबद्ध रहेको पनि बताउँनु भएको छ । उहाँले इरानले पारस्परिक सम्मान, पारस्परिक लाभ र जितको नतिजाको आधारमा दुई देशको बृहत् सहयोग योजना कार्यान्वयन गर्न र विभिन्न क्षेत्रमा सहयोगलाई प्रगाढ बनाउन एवं द्विपक्षीय सम्बन्धको निरन्तर विकासलाई प्रवर्द्धन गर्न इच्छुक रहेको बताउनुभयो। यसैगरी इरानले अन्तरराष्ट्रिय मामिलाहरूमा चीनसँग सञ्चार र समन्वयलाई सुदृढ गर्न इच्छुक रहेको पनि बताउँनु भएको छ । ——