कर्णाली, २१ चैत (रासस):राष्ट्रिय समाचार समिति (रासस) को ‘सेवाग्राहीसँग रासस’ अभियानअन्तर्गत आज यहाँ कर्णाली प्रदेशका पत्रकारहरूसँग अन्तरक्रिया गरियो । अन्तरक्रियामा नेपाल पत्रकार महासङ्घको कर्णाली प्रदेशको साधारणसभामा सहभागी हुन आएका महासङ्घको प्रदेशका जिल्ला अध्यक्ष र अन्य प्रतिनिधिहरूको सहभागिता रहेको थियो । सो अवसरमा राससका कार्यकारी अध्यक्ष धर्मेन्द्र झाले कर्णालीको मिडिया विकासका लागि रासस सहकार्य गर्न तयार रहेको बताउनुभयो । उहाँले कर्णाली प्रदेशको मिडियाको अवस्थाबारे आफू जानकार रहेको बताउँदै यस प्रदेशको मिडिया विकासका लागि सरोकारवाला निकायहरूसँग सहकार्य गर्न तयार रहेको उल्लेख गर्नुभयो । कार्यक्रममा कर्णाली प्रदेशका पूर्वमुख्यमन्त्री महेन्द्रबहादुर शाहीले कर्णालीको विकासमा राससजस्ता सञ्चार माध्यमहरूले पनि योगदान दिनसक्ने बताउनुभयो । नेपाल पत्रकार महासङ्घका अध्यक्ष विपुल पोखरेलले राससले आम जनतालाई सुसूचित गराउन धेरै सञ्चार माध्यमलाई आफ्ना ग्राहक बनाउन सुरु गरेको अभियान सकारात्मक रहेको उल्लेख गर्नुभयो । राससका सञ्चालक समिति सदस्य कृष्ण अधिकारी र बजार शाखा प्रमुख राजाराम कार्कीले पनि मुलुकमा सञ्चालित सञ्चार माध्यमहरूमार्फत आम जनतासमक्ष सूचना पुर्याउन धेरैभन्दा धेरै सञ्चारमाध्यमलाई राससको सेवा पुर्याउने अभियानलाई तीव्रता दिइएको बताउनुभयो । सो अवसरमा अध्यक्ष झाले पूर्वमुख्यमन्त्री शाही र नेपाल पत्रकार महासङ्घका अध्यक्ष पोखरेललाई राससको प्रकाशन ‘रासस हिजो र आज’ पुस्तक प्रदान गर्नुभएको थियो । –––