काठमाडौँ, १४ भदौ : नेपालका यौनिक तथा लैङ्गिक अल्पसङ्ख्यक (एलजीबीटीआई) समुदायले विभेदरहित समाज निर्माण र समान अधिकारको माग राख्दै आज काठमाडौँमा २०औँ ‘नेपाल गौरव यात्रा तथा गाईजात्रा उत्सव’ मनाएका छन् । यौनिक लैङ्गिक अल्पसङ्ख्यक समुदायले अधिकारको माग गर्दै राष्ट्रिय गाईजात्रालाई अन्तर्राष्ट्रियरूपमा सन् २००१ देखि मनाउँदै आएका छन् । ‘गाईजात्रा’ पर्वको अवसरमा नेपालस्थित अमेरिकी दूतावास र राइट टु राइट हेयर नामक संस्थाको सहयोगमा नीलहिरा समाजले गाईजात्रा उत्सवसँगै गौरव यात्राको आयोजना गरेको हो । राससका अनुुसार एक वर्षभित्र दिवङ्गत भएका आफ्ना समुदायका व्यक्तिहरूको सम्झनामा समाजले सप्तरङ्गी दीप प्रज्वलन गर्दै गौरव यात्राको सुरुआत गरेको थियो । कार्यक्रममा सहभागी महिला, बालबालिका तथा ज्येष्ठ नागरिक मन्त्रालयका मन्त्री सुरेन्द्रराज आचार्य, नेपालका लागि अमेरिकी राजदूत डिन आर थम्पसन, डेनिस राजदूतावासका प्रतिनिधिलगायतले यौनिक तथा लैङ्गिक अल्पसङ्ख्यक समुदायलाई सम्मान, माया र सदभाव व्यक्त गर्न सचेतना जगाउने उद्देश्यले कार्यक्रम आयोजना गरिएकोप्रति खुसी व्यक्त गर्नुभयो । ‘गौरव यात्रा’ अर्थात् प्राइड परेडलाई सहयोग गर्न पाउँदा काठमाडौँस्थित अमेरिकी दूतावासलाई गर्व महसुस भएको राजदूत थम्पसनले बताउनुभयो । उहाँले भन्नुभयो, “यौनिक तथा लैङ्गिक अल्पसङ्ख्यकका जीवनको सम्मान गर्दै आज हामी गर्वका साथ हिँडेका छौँ । समाजमा उनीहरूको योगदान, सङ्घर्ष र सफलताबारे चिन्तन गर्न यो एउटा महत्त्वपूर्ण अवसर हो ।” कार्यक्रममा नीलहिरा समाजकी अध्यक्ष पिङ्की गुरुङले समुदायका व्यक्तिमाथि विभेद र अपमानपूर्ण व्यवहारका कारण विभिन्न समस्या बढ्दै गएकोप्रति दुःख व्यक्त गर्नुभयो । “दुई दशकको सङ्घर्षमा हामीले धेरै अधिकार प्राप्त त गरिसकेका छौँ तर अझै पनि समाजको दृष्टिकोण फेरिएको छैन । सम्मानपूर्वक बाँच्ने वातावरण सबै नागरिकले बनाइदिनुहुन्छ भन्ने अपेक्षा गरेका छौँ”, अध्यक्ष गुरुङले भन्नुभयो । ठमेलबाट सुरु भएको गौरव यात्रा वसन्तपुर, न्यूरोड हुँदै टुँडिखेलमा पुगेर समापन भएको थियो । सोही अवसरमा टुँडिखेलमा ‘गाईजात्रा प्राइड परेड कन्सर्ट’ मा समुदायका कलाकारसँगै गायक प्रकाश सपुत, कुटुम्ब ब्याण्ड, गायिका सुवानी मोक्तान, एलिना चौहानलगायतले साङ्गीतिक प्रस्तुती दिनुभयो । कार्यक्रममा मानवअधिकारको सम्मानका निम्ति गरिएको वर्षौंको सङ्घर्ष र यौनिक तथा लैङ्गिक अल्पसङ्ख्यक समुदायका सदस्यको कानूनी समानताका लागि जारी प्रयासका साथसाथै उपलब्धिको स्मरणमा गरिएको थियो । वार्षिकरूपमा आयोजित यी कार्यक्रमले स्वीकार्यता, विविधता र प्रेमको महत्त्वबारे सशक्त भूमिका निभाउने विश्वास आयोजकको छ । उत्सवमा देशभरका यौनिक तथा लैङ्गिक अल्पसङ्ख्यक समुदायको उपस्थिति थियो । (असन बजार पत्रिका )
