गाजाको ‘पुनर्वास’ मा भूमिकाको सम्बन्धलाई बेलायती पूर्वप्रधानमन्त्री ब्लेयरद्वारा अस्वीकार
बेलायतका पूर्वप्रधानमन्त्री टोनी ब्लेयरले गाजाबाट अन्य मुलुकमा प्यालेस्टिनीहरूको पुनर्वासका बारेमा गत साताको कुराकानीमा आफूलाई जोडेको इजराइली मिडिया रिपोर्टको कडा खण्डन गर्नुभएको छ । सन् २००७ मा प्रधानमन्त्री कार्यालय छाड्नुभएका र प्यालेस्टिनी संस्थाहरू निर्माणका लागि मध्यपूर्वको राजदूतका रूपमा काम गर्नुभएका ब्लेयर गत साता इजराइलमा हुनुभएको च्यानल १२ ले आइतबार दाबी गरेको छ । उहाँले हमाससँगको युद्धपछि मध्यस्थताको भूमिकाका बारेमा इजराइली प्रधानमन्त्री बेन्यामिन नेतान्याहु र युद्ध क्याबिनेट सदस्य बेनी गान्ट्जसँग बैठक गर्नुभएको च्यानलले बताएको छ । ब्लेयरले गाजाबासीको ‘स्वेच्छिक पुनर्वास’ का बारेमा उदारवादी अरब राज्यहरूबीच मध्यस्थका रूपमा काम गर्न सक्ने बताइएको छ । द्वन्द्वको समयमा नागरिकहरूलाई निष्कासन गर्नु वा बस्न अयोग्य परिस्थिति उत्पन्न गर्नु युद्ध अपराध हो । उहाँले सन् २०१६ मा स्थापना गर्नुभएको गैर–मुनाफामूलक संस्था टोनी ब्लेयर इन्स्टिच्युट फर ग्लोबल चेन्जले रिपोर्ट ‘झुटो’ भएको बताएको छ । “टोनी ब्लेयर वा उहाँको टिमसँग सम्पर्क नगरी कथा प्रकाशित गरिएको थियो, त्यस्तो कुनै चर्चा भएको छैन”, सोमबार राति एक विज्ञप्तिमा भनिएको छ, “न त टोनी ब्लेयरले यस्तो चर्चा गर्नुभएको छ, सिद्धान्ततः यो विचार गलत छ, गाजावासी गाजामा रहन र बस्न सक्षम हुनुपर्छ ।” रमल्लाहमा प्यालेस्टिनी राष्ट्रपति कार्यालयले रिपोर्टको आलोचना गर्दै बेलायती सरकारसमक्ष प्यालेस्टिनी जनताको भाग्य र भविष्यमा हस्तक्षेप गर्न अनुमति नदिन माग गर्ने बताएको छ । “हामी पनि टोनी ब्लेयरलाई प्यालेस्टिनी क्षेत्रमा अवान्छित व्यक्ति मान्छौँ”, आधिकारिक प्यालेस्टिनी समाचार एजेन्सी वाफाले कार्यालयलाई उद्धृत गर्दै भनेको छ । इजराइल सरकारका दुई अति दक्षिणपन्थी मन्त्रीले हमाससँगको युद्धपछि यहुदीवासीलाई गाजापट्टीमा फिर्ता हुन आह्वान गर्दै प्यालेस्टिनीहरूलाई पुनर्वासका लागि प्रोत्साहित गर्नुपर्ने बताएपछि च्यानल १२ को रिपोर्ट आएको हो । अतिराष्ट्रवादी धार्मिक जियोनिजम पार्टीका प्रमुख तथा वित्तमन्त्री बेजेलेल स्मोट्रिचले इजराइली सेनाको रेडियोलाई भन्नुभयो, “गाजापट्टीमा लामो समयसम्म सैन्यरूपमा नियन्त्रण गर्नका लागि हामीलाई नागरिक उपस्थितिको आवश्यकता छ ।” उहाँका अनुसार प्यालेस्टिनीहरूलाई छाड्नका लागि इजराइलले ‘प्रोत्साहन’ गर्नुपर्छ । सोमबार इजराइलका राष्ट्रिय सुरक्षामन्त्री इटमार बेन ग्विरले भन्नुभयो, “हामीले गाजाबासीहरूको प्रवासगमनलाई प्रोत्साहित गर्नका लागि समाधानलाई बढाउनुपर्छ ।”