वासिङटन: अमेरिकाका राष्ट्रपति डोनाल्ड ट्रम्पले रुसमा पुनः निर्वाचित राष्ट्रपति भ्लादिमिर पुटिनलाई चाडै भेट्ने बताउनुभएको छ । गत आइतबार निर्वाचित पुटिनलाई भेट्न ढिला नहुने ट्रम्पले मंगलबार अमेरिकी राष्ट्रपतिको कार्यालय ह्वाइट हाउसमा पत्रकारहरुसँग बताउनुभयो । अमेरिका भ्रमणमा रहनुभएका साउदी अरबका युवराज मोहम्मद विन सलमान अल साउदसँगको भेटअघि उहाँले भन्नुभयो, “मैले नवनिर्वाचित राष्ट्रपति पुटिनलाई फोन गरेर बधाई दिएको छु ।”
आफुहरुले वासिङटन र मस्कोकोबीचमा भइरहेको हातहतियारको होडबाजीका साथै युक्रेन, सिरिया र कोरिया प्रायद्वीपको बारेमा छलफल गर्ने उहाँले जानकारी दिनुभयो । अमेरिकी राष्ट्रपतिको कार्यालयका अधिकारीका अनुसार टेलिफोन बार्ताका क्रममा ट्रम्प र पुटिनले द्विपक्षीय सम्वन्ध र सहकार्यका बारेमा छलफल गर्नुभएको छ । मंगलबार सवेरै भएको फोनवार्तामा उहाँहरुले बहुराष्ट्रिय सुरक्षा प्राथमिकता र चुनौतीका बारेमा पनि चर्चा गर्नुभएको छ । ट्रम्पले कोरिया प्रायद्वीपको बारेमा पुटिनसँग बढी जोड दिएर कुराकानी गर्नुभएको अधिकारीले जनाएका छन् । रुसको राष्ट्रपति पदमा चौथो पटक पुटिन गत आइतबार निर्वाचित हुनुभएको हो । ७६ प्रतिशतभन्दा बढी मत ल्याएर उहाँ आगामी छ वर्षका लागि राष्ट्रपतिमा निर्वाचित हुनुभएको हो । (रासस/सिन्ह्वा)
