काठमाडौं । सरकारले मेलम्ची खानेपानी आयोजना निर्माणको ठेक्का लिएको इटालीको सीएमसी कम्पनीसँग ठेक्का रद्द गरेको छ ।
ठेक्का रद्द भएसँगै कम्पनीको धरौटी सरकारले जफत गर्ने भएको छ । कम्पनीले क्षतिपूर्ति माग गरेको ३६ करोड रुपैयाँ सरकारले नतिरेपछि कम्पनीमा आर्थिक संकट देखिएको भन्दै कम्पनीले सरकारलाई पुस २ गते क्षतिपूर्ति नतिरे काम गर्न नसक्ने बताउँदै पत्र पठाएको थियो ।
यसपछि आयोजनाको काम ठप्प पार्दै सीएमसीका प्रतिनिधि इटाली जान लागेको अवस्थामा खानेपानी मन्त्रालयले उनीहरुलाई रोकेको थियो । सीएमसीसँग ठेक्का तोडिएपछि अब अर्को निर्माण कम्पनीलाई टेन्डर दिइने खानेपानी मन्त्रालयले जनाएको छ ।