विराटनगर, ३ साउन (असनबजार पत्रिका) : नेकपा एमालेका वरिष्ठ उपाध्यक्ष ईश्वर पोखरेलले पार्टी अध्यक्ष केपी शर्मा ओलीले सङ्घीयताका विषयमा बोलेको कुरालाई केही मिडियाले तिललाई पहाड बनाउन खोजेको भनी अध्यक्ष ओलकिो प्रतिरक्षा गरेका छन् । विराटनगरमा मंगलबार सञ्चारकर्मीहरुसँग भेटघाट गर्दै पोखरेलले भने , ‘त्यो छलफलमा म पनि सँगै थिएँ, त्यहाँ बोलेका विषय सबै मैले सुनेको छँु, अब कसले के टिपेर लग्यो हामीले जान्ने कुरा भएन । तर अध्यक्षले त्यस्तो बोल्नुभएको होइन ।’
उनले कसैलाई मन लाग्दैमा सङ्घीयता खारेज नहुने बताउँदै भने, ‘नेपालको संविधान सहमतिमा बनेकाले कुनै एक जनालाई चाहना हुँदैमा सङ्घीयता खारेज नहुने र संविधान हामीले सहमतिमा बनाएका हौं, हामी सहमतिभन्दा बाहिर छैनौं । केही व्यक्तिहरुलाई त्यस्तो लागेर छलफल गरे होलान्, तर त्यस्तो हुँदैन । हाम्रो संविधान संशोधनीय छ तर एउटाले चाहेर मात्र हुने कुरा होइन ।’
अर्को प्रसङ्गमा नेता पोखरेलले गोपनीयताका कारणले एमालेका अर्थ तथा योजना विभागका सदस्य एम. अधिकारीको फोटो सार्वजनिक नगरेको प्रष्टीकरण दिए । यतिधेरै विवाद हुँदा पनि गभर्नरले नैतिकता नदेखाएको र एमालेले एम अधिकारीको फोटो किन सार्वजनिक नगरेको भन्ने प्रश्नमा नेता पोखरेलले गोपनीयताको प्रसङ्ग उठाए ।
उनले भने, ‘व्यक्तिले आफ्नो पोजिसन बताएका छन्, सम्बन्धित दलले आफ्नो पोजिसन बताएको छ भनेपछि त्यसमा अरु किन धेरै खनजोत ? राज्य सञ्चालनसँग गाँसिएका कुरामा गोपनीयता हुने भएकाले एम.अधिकारीको गोपनीयता कायम राखेको हो ।’ उनको कथन छ, ‘राजनीतिक दलहरुभित्र यस्ता कतिपय कुराहरु हुन्छन्, सबै सार्वजनिक गर्नुपर्छ भन्ने हुन्छ ? हुँदैन नि ।’
नेपाली कांग्रेसको बैठकले आगामी प्रदेश तथा सङ्घीय चुनावमा गठबन्धन बनाउने निर्णय गरेको विषयमा उनले एमाले चुनावी प्रतिस्पर्धाका लागि तयार रहेको बताए । ‘सके एक्लाएक्लै नसके गठबन्धन बनाएर चुनावमा आउँदा हुन्छ भनेर हामीले भनिआएकै छौं,’ पोखरेलले भने, ‘हामी देशव्यापी गठबन्धन गरेर होइन स्थानीय आवश्यकताका आधारमा तालमेल गरेर चुनावमा जान्छौं ।’
