सिन्धुपाल्चोक, २९ कात्तिक (अबप/ रासस) : वर्षाका कारण अवरुद्ध मेलम्चीको पानी पुनः काठमाडौँ पठाउनका लागि काम सुरु गरिएको छ । वर्षायाममा क्षति हुनसक्ने भन्दै गत जेठमा बन्द गरिएको सुरुङ हालसम्म सञ्चालन गरिएको थिएन । यस वर्ष सुरुङमा खासै क्षति नभए पनि आयोजना स्थलसम्म पुग्ने सडक अधिकांश बिग्रिएको थियो । सो सडक निर्माणको काम अन्तिम चरणमा पुगेको मेलम्ची खानेपानी आयोजनाका सिनियर डिभिजनल इन्जिनियर पदमबहादुर कुँवरले बताउनुभयो । अहिले आयोजनाको टोली मुहान मर्मतमा खटिएको उहाँले जानकारी दिनुभयो ।
आवश्यक उपकरणसहितको टोली आयोजनास्थलमा खटिएको र खोला डाइभर्टलगायत केही काम सुरु गरिएको उहाँले बताउनुभयो । भोलिदेखि सुरुङ खोतल्ने काम सुरु हुने उहाँको भनाइ छ । सुरुङभित्र खासै क्षति नभएको, सुरुङ बाहिर पनि गत सालभन्दा आधा मात्र सरसफाइ गर्नुपर्ने देखिएको उहाँले बताउनुभयो । जतिसक्दो छिटो पानी सुरुङमा पठाउने गरी काम गरिने उहाँको भनाइ छ । उहाँका अनुसार सडक अवरुद्ध भएकाले मेसिन आयोजनास्थलमा पु¥याउन नसक्दा पानी ल्याउन ढिलाइ भएको हो । विसं २०७८ असार १ को बाढीले आयोजनाको बाँध र हेडवक्र्समा क्षति पु¥याएपछि मर्मत गरी २०७९ वैशाख ११ गतेदेखि जेठ तस्रो सातासम्म पानी लगिएको थियो । विसं २०७८ असार १ गते सुपरीवेक्षण गर्नका लागि भन्दै सुरुङ बन्द गरेकै दिनमा ठूलो बाढी आएर मेलम्चीको हेडवक्र्स क्षेत्रमा क्षति पुगेको थियो । गेग्रान हटाउने कार्य चिनियाँ निर्माण कम्पनी सिनो हाइड्रो पावरले गर्ने छ ।
यसैबीच नेकपा एमालेका स्थायी कमिटी सदस्य एवं सिन्धुपाल्चोक प्रतिनिधिसभा क्षेत्र नम्बर २ का एमाले उम्मेदवार शेरबहादुर तामाङले मेलम्ची खानेपानीको लेबी जुनसुकै हालतमा सिन्धुपाल्चोकवासीले पाउनुपर्ने बताउनुभएको छ । आफू सरकार र सदनमा हुँदा लेबीको विषयमा खरो रूपमा लागेको बताउनुहुँदै उहाँले सबै प्रक्रिया पूरा गरेर फाइल खानेपानी मन्त्रालयमा अड्केको बताउनुभयो ।
रेडियोको एक कार्यक्रममा बोल्नुहुँदै उहाँले खानेपानी मन्त्रालयमा भएको फाइलमा धुलो लागेको छ भने धुलो टकटक्याएर भए पनि फाइल अगाडी बढाउने प्रतिबद्धता जनाउनुभयो । गठबन्धनको सरकार बनेपछि फाइल अड्केको बताउनुहुँदै उहाँले गठबन्धनलाई मेलम्चीवासीको पीडा बोध नभएको आरोप लगाउनुभयो । ‘मेलम्चीको पीडा बोकेको मान्य त सरकारमा भएन । अरूलाई मेलम्चीको पीडाले पालेन । र,त्यो फाइल अगाडी बढेको छैन । अब मैले जितेपछि धुलोमा छ कि कहाँ छ टकटक्याएर भए पनि खोजेर लडेर क्याबिनेटमा पुर्याएर यो क्षेत्रको जनताले लेबी प्राप्त गर्ने कुराको सुनिश्चितता गर्छु’, उहाँले भन्नुभयो ।
यो खबर पढेर तपाईलाई कस्तो महसुस भयो ?