गगनयान परीक्षण उडान भारतका लागि कोसेढुङ्गा– इसरोका पूर्वप्रमुख
त्रिभुवन्थपुरम, भारत, ४ कात्तिक (एएनआई) इसरोका पूर्वप्रमुख जी माधवन नायरले शनिबार भारतीय अन्तरिक्ष एजेन्सीको मानवरहित परीक्षण उडान ‘मिसन गगनयान’ को सफल प्रक्षेपण निकट भविष्यमा मानवलाई अन्तरिक्षमा पठाउने भारतको कार्यक्रमका लागि ‘कोसेढुङ्गा’ भएको बताउनुभएको छ । “इसरोको टिभी–डी१ मिसन आज सफलतापूर्वक पूरा भएको सुनेर मलाई अत्यन्त खुसी लागेको छ”, उहाँले भन्नुभयो । आजको परीक्षण उडान (टेस्ट भेहिकल डी१ मिसन) यसको क्रु मोड्युलको आपत्कालीन सुरक्षा प्रणालीको परीक्षण गर्नका लागि गरिएको थियो । यो थ्रस्टरबाट अलग भयो र प्रक्षेपणको करिब १० मिनेटपछि समुद्रमा सफल अवतरण भयो । टिभी डी१ मिसन बिहान ८ः४५ बजे इन्जिन इग्निसनको समस्या भएपछि आजै बिहान १० बजे दोस्रो प्रयासमा प्रक्षेपण गरिएको हो । सुरुमा यसलाई बिहान ८ बजे प्रक्षेपण स्थलबाट प्रक्षेपण गर्ने तय गरिएको थियो जसलाई परिवर्तन गरेर बिहान ८ः४५ बजे र पछि बिहान १० बजे प्रक्षेपण गर्ने समय मिलाइएको थियो । इसरोका पूर्वप्रमुख नायरका अनुसार श्रीहरिकोटामा खराब मौसमका कारण पहिलो प्रक्षेपण करिब ४० मिनेट ढिलो भएको थियो, पछि प्रक्षेपणको प्रयास गर्दा स्वचालित प्र्रक्षेपण प्रणालीले लिफ्ट–अफभन्दा केही सेकेन्डअघि स्थगनको आदेश दिएको थियो ।