तेल अभिभ ( एजेन्सीहरु ) अमेरिका र बेलायतको दबाबका कारण इजरायली सेना गाजाको सीमामा नै रोकिएका छन । समाचारमा जनाइएअनुसार गाजामा बन्दी बनाइएका बन्धकहरुलाई छुटाउनकालागि पहल भएको समेत बताइएको छ । एएफपीका अनुसार उता सहयोग परिषद् र दक्षिणपूर्वी एसियाली राष्ट्रहरूको सङ्गठन आसियान का नेताहरूले शुक्रबार गाजामा भएको पछिल्लो घटनाक्रमको समीक्षा गरेका छन् ।साउदीको राजधानी रियादमा आयोजित पहिलो सो संयुक्त शिखर सम्मेलनका क्रममा सहभागीहरूले मध्य पूर्वमा विकसित पछिल्लो घटनाक्रम बारे विचार आदानप्रदान गर्दै गम्भीर चिन्ता व्यक्त गरेको साउदी प्रेस एजेन्सीले उल्लेख गरेको छ।सहभागी नेताहरूले नागरिकहरू विरुद्ध भएका सबै प्रकारका आक्रमणहरूको निन्दा गर्दै गाजामा मानवीय सहायता, राहत सामग्री र अन्य आवश्यकतामा नागरिकहरूको प्रभावकारी पहुँच सुनिश्चित गर्न र गाजामा विद्युत, पानी र सबै किसिमका अत्यावश्यक सेवाहरू पुनः सञ्चालनमा ल्याउन पहल गर्न सबै सम्बन्धित पक्षहरूलाई अपिल गर्दै दिगो युद्धविरामको आह्वान गरेका छन् ।शिखर सम्मेलनले द्वन्द्वरत पक्षहरूलाई नागरिकहरूको सुरक्षा गर्न र उनीहरूलाई लक्षित नगर्न र अन्तरराष्ट्रिय मानवीय कानूनको पालना गर्न आह्वान गरेको छ। सम्मेलन बन्दीहरूको तत्काल र निःशर्त रिहा गर्न पनि आग्रह गरेको छ ।शिखर सम्मेलनले अन्तरराष्ट्रिय कानून र सान्दर्भिक संयुक्त राष्ट्रसंघ सुरक्षा परिषद्को प्रस्ताव अनुसार समास्याको समाधानका लागि प्रयासमा जोड दिएको छ।साउदी राजा सलमान बिन अब्दुलअजीज अल साउदको निमन्त्रणामा भएको शिखर सम्मेलनले दुई सङ्गठन बीचको सहयोगको समीक्षा र क्षेत्रीय र अन्तरराष्ट्रिय मुद्दाहरू बारे विचार आदानप्रदान पनि गरेको थियो।
४ जेष्ठ २०८१, शुक्रबार
