कायरो, ११ चैत (एएफपी) :संयुक्त राष्ट्रसङ्घका महासचिव एन्टोनियो गुटेरेसले कायरोमा आइतबार भोकमरीको खतरामा रहेको गाजामा आवश्यक सहायता पुर्याउन ‘इजराइलले राहतका लागि बाँकी अवरोध र चेकपोइन्टहरू हटाउन आवश्यक रहेको’ बताउनुभएको छ । इजिप्टका विदेशमन्त्री सामेह शौकरीसँगको संयुक्त पत्रकार सम्मेलनमा उहाँले ‘गाजामा दुःस्वप्नबाट बच्न सङ्घर्ष गरिरहेका प्यालेस्टिनी बालबालिका, महिला र पुरुषहरूको दुर्दशा’ कम गर्नका लागि ‘तत्काल मानवीय युद्धविराम’ को आफ्नो आह्वानलाई दोहोर्याउनुभयो । उहाँले शनिबार गाजासँगको रफा सीमाको भ्रमण गर्नुभएको थियो । रफामा छ महिनाको युद्ध र घेराबन्दीले गाजा क्षेत्रका २४ लाख मानिसमध्ये अधिकांशलाई विस्थापित गरेको छ र गाजाको नागरिक पूर्वाधारलाई ध्वस्त बनाएको छ । “गाजालाई हेर्दा युद्ध, अनिकाल, विजय र मृत्युका चार घोडचढीले यसलाई पार गर्दैछन् भन्ने प्रतीत हुन्छ”, महासचिव गुटेरेसले भन्नुभयो, “बन्दुकलाई शान्त पार्ने र तत्काल मानवीय युद्धविराम सुनिश्चित गर्ने समय आएको सम्पूर्ण विश्वले बुझेको छ ।” इजराइली सरकारमाथि गाजामा बमबारी र स्थल आक्रमणलाई कम गर्न अन्तर्राष्ट्रिय दबाब बढिरहेको छ । इजराइलले आफ्नो जवाफी सैन्य अभियानलाई गाजाको सबैभन्दा दक्षिणी सहर रफासम्म जारी राख्ने वाचा गरेको छ । इजिप्टको सीमासँग जोडिएको रफामा १५ लाख प्यालेस्टिनीले शरण मागेका छन् । इजिप्टका राष्ट्रपति अब्देल फतह अल–सिसीसँग पनि भेटवार्ता गर्नुभएका महासचिव गुटेरेसले रफा सीमा नाका र इजिप्टको एल–अरिश विमानस्थललाई ‘गाजामा जीवन रक्षक सहायताका लागि आवश्यक धमनीहरू’ भएको बताउनुभयो । “तर ती धमनीहरू अवरुद्ध भएका छन्”, उहाँले भन्नुभयो, “इजिप्टतिर ट्रकहरूको लाइन लागेको छ, मानवीय स्थिति खराब भएका कारण मात्र ट्रकहरूको आवागमन बढिरहेको छ ।” इजराइलसँग सहायतामाथिको प्रतिबन्ध कम गर्न र गाजामा थप क्रसिङ खोल्नका लागि मागहरू बढेका छन् । “गाजामा प्यालेस्टिनीहरूलाई वाचा गरिएको सहायताको थोपा होइन, बाढी नै आवश्यक छ”, गुटेरेसले भन्नुभयो । संयुक्त राष्ट्रसङ्घले बारम्बार प्यालेस्टिनी क्षेत्र विशेषगरी उत्तरी क्षेत्रमा अनिकालको चेतावनी दिएको छ । प्यालेस्टिनको उत्तरी क्षेत्र ठूलो मात्रामा सहायता वितरणबाट विच्छेद भएको छ । –––