बेइजिङ, १२ चैत (सिन्ह्वा) :चीनका प्रधानमन्त्री ली छ्याङले अन्तर्राष्ट्रिय मुद्राकोष (आइएमएफ) सँग घनिष्ठ सहयोगका लागि आह्वान गर्नुभएको छ । बेइजिङमा सोमबार आइएमएफका प्रबन्ध निर्देशक क्रिस्टालिना जर्जिएभासँगको भेटमा उहाँले त्यस्तो आह्वान गर्नुभएको हो । उहाँले यस वर्ष चीनले राखेको करिब पाँच प्रतिशत कूल गार्हस्थ्य उत्पादन (जिडिपी) वृद्धिको लक्ष्य वैश्विक अर्थतन्त्रका लागि सकारात्मक खबर भएको बताउनुभयो । यस वर्षको प्रारम्भदेखि चीनको अर्थतन्त्र लगातार सुधार भइरहेको, राम्रो सुरुआत हासिल गरिरहेको र वर्षको आर्थिक तथा सामाजिक लक्ष्यहरू पूरा गर्न ठोस आधार तयार गरिरहेको उहाँको भनाइ थियो । दीर्घकालीनरूपमा चिनियाँ अर्थतन्त्रको संस्थान, बजार, उद्योग, मानव संसाधन र नवप्रवर्तनमा फाइदा छन् भन्दै प्रधानमन्त्री लीले दीर्घकालीन बलियो विकासको आधारभूत सिद्धान्त परिवर्तन नभएको र नहुने बताउनुभयो । उहाँले चीनसँग दिगो अर्थतन्त्र र सुदृढ विकास कायम राख्ने आत्मविश्वास तथा क्षमता रहेको बताउनुभयो । मुलुकलाई दृढताका साथ उच्चस्तरको खुलापनलाई निरन्तरता दिने र सबै पक्षसँग पारस्परिक लाभ र जित–जितको नतिजालाई राम्रोसँग प्रवर्द्धन गर्ने उहाँले बताउनुभयो । चीन र आइएमएफले सुदृढ सहयोगात्मक सम्बन्ध कायम गरेको भन्दै प्रधानमन्त्री लीले चीनले वैश्विक शासनमा महत्त्वपूर्ण भूमिका निर्वाह गर्नका लागि आइएमएफको समर्थन गर्ने बताउनुभयो । साथै उहाँले आइएमएसँगको सहयोगलाई अझ प्रगाढ बनाउन, विश्वव्यापी ऋण व्यवस्थापन प्रणालीमा सुधार जारी राख्न र विश्व आर्थिक सुधारमा योगदान दिन तयार रहेको बताउनुभयो । “आइएमएफले आर्थिक भूूमण्डलीकरण र स्वतन्त्र व्यापारलाई कायम राख्न, विश्वव्यापी औद्योगिक र आपूर्ति शृङ्खलालाई स्थिर र निर्बाध राख्न तथा खुला विश्व अर्थतन्त्रलाई प्रवर्द्धन गर्न सकारात्मक भूमिका निर्वाह गर्नेछ भन्ने हामीलाई आशा छ”, उहाँले भन्नुभयो । आइएमएफ प्रमुख जर्जिएभाले आइएमएफलाई दिएको बलियो समर्थनका लागि चीनलाई धन्यवाद दिनुभयो । उहाँले गत वर्ष चीनको आर्थिक वृद्धि अपेक्षाभन्दा बढी भएको र हरित अर्थतन्त्र, डिजिटल अर्थतन्त्र र कृत्रिम बौद्धिकता जस्ता क्षेत्रमा विकासको राम्रो गति कायम गरेको बताउनुभयो ।