‘भारत युक्रेनको क्षेत्रीय स्थितिबारे बुझ्न इच्छुक’
नयाँदिल्ली , १६ चैत (एएनआई) :भारतका विदेशमन्त्री एस जयशङ्करले उहाँका युक्रेनी समकक्षी दिमित्रो कुलेबाबीच दुई मुलुकबीचको आर्थिक, कुटनीतिक तथा राजनीतिक बिषयमा छलफल भएको छ । विदेशमन्त्री जयशङ्करले हालका महिनाहरूमा दुई देशबीचको द्विपक्षीय सम्बन्धले निश्चित गति लिएको र भारत युक्रेनको क्षेत्रीय स्थितिबारे युक्रेनीहरूको धारणा बुझ्न जिज्ञासु रहेको बताउनुभयो । बैठकको उद्घाटन गर्दै जयशङ्करले भन्नुभयो, “हामी यस भ्रमणको प्रतिक्षामा थियौँ । हालका महिनाहरूमा हामीले विभिन्न तहमा अन्तरक्रिया गरेका छौं, हाम्रा केही द्विपक्षीय संयन्त्रहरू नवीकरण गरिएको वा स्थापना गरिएको छ ।” उहाँले थप्नुभयो, “हाम्रो द्विपक्षीय सम्बन्धले निश्चित गति लिएको छ, आजको यो छलफलपछि हामी अन्तरसरकारी आयोगको बैठकको पनि प्रतिक्षामा छौँ ।” जयशङ्करले दुई नेताहरूले हाल चलिरहेको द्वन्द्व र यसको व्यापक असरहरूमा केन्द्रित रहेर व्यापकरूपमा खुला दिलले वार्तालाप गरेको सामाजिक सञ्जालमार्फत एक्समा उल्लेख गर्नुभयो । कुलेबा बिहीबार जयशङ्करको निमन्त्रणामा दुई दिने औपचारिक भ्रमणका लागि भारत आइपुग्नुभएको थियो । भारत आइपुगेपछि मन्त्री कुलेबाले दुई देशबीचको द्विपक्षीय सम्बन्धलाई प्रगाढ बनाउन प्रधानमन्त्री नरेन्द्र मोदी र राष्ट्रपति भोलोदिमिर जेलेन्स्कीबीचको वार्तालाई अगाडि बढाउने प्रयास गर्ने बताउनुभएको थियो । —