मुख्यमन्त्री केजरीवाललगायत सबै नागरिकका अधिकार सुरक्षित हुनेमा राष्ट्रसङ्घ आशावादी
नयाँदिल्ली, १६ चैत (एएनआई) अमेरिकी विदेश मन्त्रालयले अरविन्द केजरीवालको गिरफ्तारीसम्बन्धी गरेको टिप्पणीलाई लिएर भारतले अमेरिकी दूतावासका वरिष्ठ अधिकारीसमक्ष गरेको विरोधको एक दिनपछि संयुक्त राष्ट्र सङ्घले सबैको राजनीतिक र नागरिक सम्पूर्ण अधिकार सुरक्षित हुने आशा राखेको बताएको छ । राष्ट्रसङ्घले सबै नागरिक स्वतन्त्र र निष्पक्ष वातावरणमा मतदान गर्न सक्षम रहेको कुरामा जोड दिएको छ । “हामी आशा गर्छौं कि भारतमा वा निर्वाचन हुने कुनै पनि देशमा, सबैका अधिकार सुरक्षित हुन्छन् र सबैले स्वतन्त्र र निष्पक्ष वातावरणमा मतदान गर्न पाउनेछन्,” भारतमा राजनीतिक अशान्तिको बारेमा सोधिएको प्रश्नको जवाफ दिँदै, संयुक्त राष्ट्रका महासचिवका प्रवक्ता स्टेफेन डुजारिकले भन्नुभयो । विदेश मन्त्रालयले अन्तःशुल्क सम्बन्धी मुद्दामा दिल्लीका मुख्यमन्त्री अरविन्द केजरीवालको गिरफ्तारीमा अमेरिकी विदेश मन्त्रालयका प्रवक्ताले गरेको टिप्पणीलाई अनावश्यक भन्दै आपत्ति जनाएको हो । “अमेरिकी विदेश मन्त्रालयको हालैको टिप्पणी अनुचित छ । हाम्रो चुनावी र कानुनी प्रक्रियाहरूमा यस्तो कुनै पनि बाह्य आरोप पूर्ण रूपमा अस्वीकार्य छ । भारतका कानुनी प्रक्रियाहरू कानूनको शासनद्वारा मात्र सँचालित हुन्छन्,” भारतीय विदेश मन्त्रालयका प्रवक्ता रणधीर जैसवालले साप्ताहिक पत्रकार भेटमा भन्नुभयो । “समान लोकतन्त्र भएका, विशेष गरी सँगी लोकतान्त्रिकहरू जो कोहीलाई यो तथ्यलाई कदर गर्न कुनै कठिनाइ हुँदैन । भारतलाई आफ्नो स्वतन्त्र र बलियो लोकतान्त्रिक संस्थाहरूप्रति गर्व छ । हामी त्यसलाई कुनै पनि प्रकारको अनावश्यक बाह्य प्रभावहरूबाट जोगाउन प्रतिबद्ध छौँ,” प्रवक्ताले जैसवालले बताउनुभयो । उहाँले पारस्परिक सम्मान र साझेदारी नै अन्तर्राष्ट्रिय सम्बन्धको जग हुनेहुँदा र राज्यले अरूको सार्वभौमसत्ता र आन्तरिक मामिलाको सम्मान गर्नुपर्नेमा जोड दिनुभयो । यसअघि बुधबार, अमेरिकी विदेश मन्त्रालयका प्रवक्ता म्याथ्यू मिलरले दिल्लीका मुख्यमन्त्री केजरीवालको गिरफ्तारीलगायत मुद्दाका विषयमा प्रतिक्रिया दिँदै यी कार्यहरूलाई नजिकबाट पछ्याइरहेको बताउनुभएको थियो । “हामी यी प्रत्येक मुद्दाका लागि निष्पक्ष, पारदर्शी र समयसापेक्ष कानुनी प्रक्रियालाई प्रोत्साहन गर्छौं,” प्रवक्ता मिलरले भन्नुभयो । गत शुक्रबार, जर्मन विदेश मन्त्रालयका प्रवक्तालाई केजरीवालको गिरफ्तारीको बारेमा प्रश्न गर्दा ‘उहाँ निष्पक्ष सुनुवाइको हकदार भएको’ टिप्पणी गर्नुभएको थियो । उक्त टिप्पणीविरुद्ध गत हप्ता भारतको विदेश मन्त्रालयले आफ्नो ‘न्यायिक प्रक्रिया’ मा हस्तक्षेप र न्यायपालिकाको स्वतन्त्रताको हनन भएको बताएको थियो । केजरीवाललाई प्रवर्तन निर्देशालय (इडी)ले दिल्लीको अन्तःशुल्क नीतिसँग सम्बन्धित सम्पति सुद्धिकरणको मुद्धाको आरोपमा पक्राउ गरेको थियो । —