सप्तरी, १ भदौ । नेकपा माओवादी केन्द्रका अध्यक्ष पुष्पकमल दाहाल ‘प्रचण्ड’सहित दुई मन्त्रीले बुधबार सप्तरीका बाढी प्रभावित क्षेत्रको स्थलगत निरीक्षण एवं अनुगमन गरेका छन् ।
पूर्वप्रधानमन्त्री प्रचण्डसँगै राजधानीबाट हेलिकप्टरमा सप्तरी आएका गृहमन्त्री जनार्दन शर्मा र आपूर्तिमन्त्री शिवकुमार मण्डलले जिल्लाको हनुमाननगर कंकालिनी नगरपालिकाको इनर्वा र राजविराज नगरपालिका–१५ देउरी भरुवाको बाढीग्रस्त क्षेत्रको स्थलगत निरीक्षण गरेका हुन् ।
सो दुई ठाउँको निरीक्षण गर्दै माओवादी केन्द्रका अध्यक्ष प्रचण्डले बाढीपीडित जनताको उद्दार र पुनःस्थापनाका लागि सरकारले काम गरिरहेको बताउँदै यसमा आफ्नो पार्टीले पनि सहयोग गर्ने वचनबद्धता व्यक्त गरे । उनले बाढीले ठूलो क्षति गरेकाले राहतमा कुनै कमी हुन नदिने भने ।
तराई–मधेश, हिमाल, पहाड जहाँका जनता भए पनि आपतविपद् परेका बेला एकले अर्कालाई सहयोग गर्नुपर्ने बताउँदै पहाडमा भूकम्प जाँदा तराईका जनताले निकै ठूलो हृदयले सहयोग गरे जस्तै अहिले तराईमा विपद् पर्दा पहाडका जनताले पनि सहयोग गर्ने उनले उल्लेख गर्नुभयो ।
सप्तरीको इनर्वा पुगेका गृहमन्त्री जनार्दन शर्माले बाढी प्रभावितका लागि खाद्यान्नलगायत राहत सामग्रीको अभाव नरहेको बताउँदै राहत वितरण प्रक्रियामा चारैतिर डुबान रहेका कारण बाटोको समस्याले राहत वितरण र व्यवस्थित गर्न समस्या भइरहेको बताए ।
गृहमन्त्री शर्माले भारतीय बाँधका कारण नेपाली भूभाग डुबानमा पर्ने गरेको विषयमा कूटनीतिकस्तरमा समेत छलफल भइरहेको जानकारी दिनुभयो ।
यस्तै, आपूर्तिमन्त्री मण्डलले तत्काल बाढीपीडितका लागि राहत सामग्रीको अभाव नरहेको बताउँदै चामल सहितको राहत तत्कालै पठाउनुपर्नेमा सामग्री पठाइसकिएको र समयमा वितरण गर्न सम्बन्धित निकायलाई निर्देशन दिए ।
